کئفلی ایسکندر

دین سیزین الیندن ایمان سیز گلر!

دونن آخشام دان  خئیلک گئچمیشدی، آمبولانس سسی کوچه میزین ساکیت اوجاغین آلیشدیریب سس –کویو قوزادی .دئمه لی خیراللاه ائله بیردن  اوزو قویلو زکییه خالانین قاباغیندا دوشوب ،اوزوندن گئتمیشدی.

 خیلاصه قونشو اولماقدا اونلارین دالیسیجا ،بیزده خسته خانایا یولا دوشدوق .من اوزامان یئتیشدیم کی خیراللاه دایی نی تخت اوسته ،اوزاتمیشدیلار. اوزونه  گلیب، چوخ هارای- داد ائیله یردی. ائله هی دئیردی: ای وای زکییه اولوره م! زکییه هارداسان؟ زکییه- زکییه من آخی اونون آدامییام؟! زکییه ؟

هامیدا ائله ائشیکده- ایچه ریده صفیله ادب- ارکانیله ایاق اوسته ،دورموشدولار . دوکتورلاریله - طیب باجیلاری ائله تله سیک اویان -بویانا قاچیردیلار .من اوزاقدان گوردوم خیراللاه دایی نین قدیم یولداشلاریندان بیری مهدی عمی، سالندا گلیر.یولداشی  یئتیشن آن ،خیراللاه برکیدن هاوار تپیردی ،زکییه خانیم دا اونون الیندن یاپیشیب، هی دئیردی :خیراللا بیر آز دوز دوکتورلار دئیرکی ایندی داوالار اثرین قویار.

 خیراللاه دا دال با دال دئیردی: یوخ منیم کی داها داوادان- دووادان سوووشوب، اولمه لییه م .

بو هی نیده مهدی عمی یاخینلاشیب، زکییه خالایا دئدی: سیز بیر کنار اولون منیم بو خیراللاهیله بیر ایشیم وار.  یازیق زکییه ده چکیلدی کنارا، مهدی عمی یه یول آچدی. مهدی عمی یاخینلاشیب خیراللاهین قولاغینا یاواشجا،دئدی خیراللاه .....

خیراللاه،دئدی: نه دی مهدی؟ مهدی دئدی: خیراللاه کوپک اوغلی سن نه دی؟ بو ایش نه دی؟ سنه هئچ یاراشار ،کس سسین! داها خیراللاه دان بیر سس چیخمیردی ! ائله باشین ایب ،گوزله رین یوموب ،دینیب- دانیشمادان ،سس سیز- صداسیز یاتمیشدی!

 زکییه خالا اللرین قوزایب گویه اللاها مین شوکورلر ائیله یردی، دئیردی: مهدی عمی اللاه سنی هایاندان یئتیردی سحردن گلردیندا!

گرگرلی آراز