موختارنامه نین صاحا بییه م!

یازار : گرگرلی آراز

+0 به یه ن

موختارنامه نین صاحا بییه م!

 

اینتیخابات زامانیدی، هامی مونتظیریدی گوره سن کیم نئجه  تبلیقات ائیلییه جک، کیم اینتیخاباتدا غلبه  گله جک . بیزیم موحالدا، چوخلو اؤزون دئپوتاد سئچیمینه  یازمیشدی. هله تبلیقاتا بیر -ایکی هفته قالیردی، ائولرده- قوناقلیقلاردا- مجلیسلرده، دانیشمالار- گوروشلر گئچیرله نیردی. بو سفر قاسیما* گوره احمدین ائوینده یدیک. قاسیم قوناقلار گلمه میشدن، اؤزون منیم یانیما وئریب، بیر- ایکی عکس لریندن- یازیلاریندان منه وئردی. عینکی عوض ائیله دیم،کاغیزلارا بیر- بیر باخیردیم، اونلار چوخ گوزل رانگیده -ماتیرالدا ،سالینیب یازیلمیشدی، گوزل سوزلر دئیلمیشدی. بیزیم بو قاسیم زمین شیناسلیقدا ، فوق لیسانس یدی، اون آلتی ایل محیط زیست ایداره سینده ایشله ییر. شهریمیزین شوراسینا ایکی دفعه چیخیب، مچیدیمیزده هئیت اومنادندی. بیر -ایکی دفعه ، بش  گونلوک  اوردویا گئدیب، میرده شورخانامیزین چوخداندان کفنداریدی .بونلارین هامی سی بیر- بیر قید اولونموشدی ،هامی سیدا دوزودی، یازیق قاسیم بو یولدا چوخلی زحمته دوشموشدی. ژئستی پارتلئتلرینده ده گوزلیدی، ائله عکس یده دورموشدی، او پیچاق- قمه  ده ین یئرلر گورسنمیردی! آمما بیر- ایکی سوز گوردوم یازمیشدی، سیزه دئمه ییم پیس اولماز. ایلک اویودی کی اؤز عکسینین آلتیندا یازمیشدی: ایه ر منه رای وئرسه نیز، من مجلیسه چیخا بیلسه م، مشهدی قوربانیله -کربلایی نجفی اوتوز ایلدن سونرا باریشدراجاقام! کند چشمه سین آریددایاجه یم، قصصاب مشهدی حسنی باغلادلایاجه یم .....قاسیما، دئدیم:بونلار نه سوزدی یازمیسان؟ دئدی: نئجه کی؟ دئدیم: قاسیم، سن قانون وئره ن سن، بیرده قانونون نگهبانی، داها هئچ. دئدی: یوخ، بونلاری یازمیشام، بونلار چوخ مهم بیر سوزلردی. میثال اوچون مشهدی قوربانیله- کربلایی نجف باریشسالار، ائله بیل آبوشیله- بیزیم دوولت باریشیب. کند چشمه سی آرینسا ،ائله بیل اورمو گولو دوزه لیب.  قصصاب مشهدی حسنی باغلاسام، ائله بیل وبا ناخوشلوقون حصارا سالمیشام !بو او قدر بیزه ائششک- آت اتی یئدیردیب ها ،باغلاماق سهلیدی- بوینون وورماقا حققی میز وار! بابت منی سوزلریلن ایناندیردی، آمما ایکینجی سوزلرین داها نقدر دئسه ده اینانمارام، او بئله یازمیشدی :موختارنامه نین- گلستانین - حیدربابانین صاحبی! قانیم کلله مه چیخدی، دئدیم: آی جانیم موختارنامه نی یا او بیر سی کیتابلاری  سن یازیبسان؟ نییه یالاندان دانیشیرسان؟ قاسیم چوخ اوزی قیرمیزی، دئدی: دوزون دئمیشم دا ،من اونلارین صاحبی یم، اونلارین اوچونده آلمیشام. بیر باخدیم تاقچایا، دئدیم :نییه بس استغفراللاه نهج البلاغه نی- قورآنی یازمامیسان؟ بیر باشین  آشاقا سالدی، دئدی: قورخدوم اینانمییالا او جهتدن یازمادیم !دئدیم بونلاری ایناناللار؟ دئدی :نییه اینانماسینلار؟ کیم نه بیلیر ایندییه جان بونلاری کیم اوخویوب؟ بیرده کی یالان دئمیرم اونلارین صاحبی یم.  بیر باخدیم قاسیمین اوزونه، اؤز- اؤزومه دئدیم: گور بیزه کیم ایسته یر صاحاب اولسون !!

 

گرگرلی آراز

قاسیم =خییالی بیر آد


چاققالا آشی

یازار : گرگرلی آراز

+0 به یه ن

چاققالا آشی

 

بیزیم بو آنا بیگیم ین اری، چوخ بیر گوزل سیننی گئچمیش آدامدی. اکینچیدی، یئکه- یئکه باغلاری، چوخلی یئمیش- تاخیلی ایل باشی اوزونه توپلایار. آمما اؤز مالینداندا گوزل موغایات اولان اینساندی، قویماز اونا بیر نفر زور دئسین. آمما بولمورم بو خیردا خانیم گیله ،نییه هئچ بیر سوز دئمیر، هرنه قدر باغدان یئر- یئمیش آپاریللار، اصلا ایشی یوخدی. بیر گون بو مسئله نی حاجی عمی دن خبر آلدیم .او بئله سوزه گلدی:

 بالا اوغلوم بیر گون باغدا گزیردیم، باغین آشاقا باشیندا ایکی آرواد گوردوم، یاواش -یاواش اوزومی قیزیل گوللرین دیبینه وئردیم ،گوروم نه دریب- آپاریللار. خیرداخانیم بیرده گلینی گلثومودی، ائله بیل خیردا خانیم ایلک گلمیشدی چاققالالاردان ییغیب آپارمیشدی ،ایکینجی دفعه گلنده،گلینی گلثوموده گتیرمیشدی.

 چاققالالاری دره -دره گلینینه بئله دئییردی: گلثوم بالا تئز اول، حاجی نین گلن زامانیدی ،او تبرزه لردن درگیلن، اونلارین گوزل آشی اولور، آدام بارماقلاریندا یئییر.من بیر تعججوب ائیله دیم، چاققالا نه دیر؟ آش نه دیر؟ آمما سونرا گوردوم کی دوز دئییر، بیر- ایکی یئرده اؤز یئریمیزده یوخ، آیری کند قونشوموزدا چاققالا آشی یئمیشه م. آللاه نه دئییم -نئجه ائیله ییم بونلار بیر آداما بو چاققالا آشین دئمه سینلر، قیزیل گوللرین  دیبیندن بیردن چیخدیم ائشیکه ،عوضین کی بونلاری پاشوتلاییم ،باغدان ائشیکه اوتوروم ،سلام وئردیم، حتتا بیر گولومسولندیم ده. اللریمی اوفکالییا -اوفکالییا بیر آز یاخینلاشدیم. خیردا خانیم -گولثوم گلینی  ایلک قورخدولار، بیر آز هویوخوب دالییا چکیلدیلر .خیردا خانیم سوزه گلدی :حاجی یولو باغلاما،دالییا گئت ،بیز سن دییه ن دئیریک ها. چکیلدیم دالییا، دئدیم: خیردا خانیم، باجی ،بونلار نه سوزدی؟ ریجا ائیله یرم بیر آز چوخ درردیز،بونلار نه دیر؟ آمما بیر ریجام وار، بو سوزی کی گلین یزله دانیشیردیز چاققالالاردان آش اولار، چاققالا آشینین صوحبتین بیر نفره محلله ده دئمییه سیز. سن آللاه هاچان چاققالا آشی گویلوزا دوشدی ،گلین اؤز باغیزدی، درین آپارین. بو سوزی محلله ده بیلسه لر ،منه باغ -باغاتدا بیر چاققالا قویمازلار !اوزاماندان اونلار محلله ده چاققالا آشدان بیر سوز دئمیللر ،منده اونلارا باغدا چاققالالار زامانی چاققالا درمه یه بیر سوزوم یوخدی.

 بو سوز هر صینفه عاید اولور. بیزیم محلله ده چورکچی میز چورکخانادا آدامیله ائله رفتارائیله یر، چورک آلماقی اوردان آدام ایسته یر بیر یوللوق ترکیدسین. او گونلری گوردوم احمدین نوبه سیده اولمویاندا ،بیر بش دانا کوره نین او گوزل یئریندن، چورکلردن آرییر ،دالیلارین سیلیر، کاغیز آراسیندا آداملار دورا -دورا احمدی چاغیریر، اونا وئریر. او گونلری احمددن ماجرانی خبر آلدیم ،احمد، دئدی: واللاه بیر سوز یوخدی بیر- ایکی دفعه او گونلرده چورکچی نی اون ساتاندا -ماشینا اونلاری ووراندا گورموشم ،باشیمی آشاقی سالیب بیر سوز-بیر یئرده دئمه میشم .چورکچی میز او زاماندان منی نوبه سیز یولا سالیر. احمد بونو دییه ندن منده ایشیمین اوجون تاپمیشام. بش -آلتی گون بوندان قاباق گوددوم -گوددوم بیر- ایکی دفعه چورکچی میزی اون ساتاندا، بهانه یلن کوچه میزدن گئچدیم، حتتا قاشدیم اونلارا کومکلیقدا ائیله دیم. او زاماندان منله ائله دوست اولوب ها ،اوشاقینا چورکلری وئریر، ائویمیزه گتیری. داها ایشیمی تاپمیشام، بیر گون بانک رئیسین گودورم، بیر گون ثبت مامورون- بیر گون دارایی ایشچیلرین -بیر گون اونو- بیر گون بونی گودورم .بوتون ایشلریم ساهمانا دوشوب .ایکی گوندی شهردارینین دالیسینجایام بیر بالاجا حیه ت برنامه سینده شهردارلیق ایشیم وار، ایستیرم الیمین آلتی ندا بیر سوزی اولسون، گوزل منی تحویل آلسین. اوندان سونرا حوسینقولی عمی له بیر ایشیم وار.  حوسینقلی عمی دن بورداکیلار تکین ضعیف نوکته تاپام ،ضعیف نوکته تاپا بیلسه م،نه جور  شعیر وئرسه م ،مجلیسلرده اوخوماقا بیر سوز دئمه ز. بیر شعریم وار عومورده ائله اونو دئمیشه م، آدین عوض ائدنده تمام مناسبت لره دوشور .باری تعالادان ایسته میشه م، نئجه بو چاققالا آشی ماددی  قیسمتینده منه یاردیجی اولوبدی، معنوی ایشیمده ده منه  کومکلیقی اولسون !!

 

گرگرلی آراز


قاباق ردیف لر فرق ائیله یر

یازار : گرگرلی آراز

+0 به یه ن
((((سالن اجرا: آمفی‌تئاتر پتروشیمی (تبریز)
تاریخ اجرا: ۱۵ بهمن ۹۴ و ۱۶ بهمن ۹۴
ساعات اجرا: 18:15، 20:30
قیمت: از 30,000 تا 100,000 تومان
 
کنسرت ارکستر فیلارمونیک تبریز
پنجشنبه 15 و جمعه 16 بهمن ساعت 20:30
اجرای دو شاهکار جاودانه از ولفگانگ آمادئوس موتزارت
سمفونی شماره 40 و کنسرتو برای کلارینت و ارکستر
با ایفای بیانی مدرن از یک قطعه موسیقی فولکلوریک آذربایجانی
رهبر ارکستر: یاشار شادپور / کنسرت مایستر: الیاس نیکو
فروش بلیت از طریق سایت و گیشه های معتبر خرید سطح شهر    قیمت بلیت:
ردیف 1 تا 5: 100.000 تومان
ردیف 6 تا 9: 80.000 تومان
ردیف 10 تا 14: 60.000 تومان
بالکن:
ردیف 1 تا 4: 40.000 تومان
ردیف 5 تا 8: 30.000 تومان))))

قاباق ردیف لر فرق ائیله یر

اوشاقلار چوخ آتیلیب دوشوردولر: آغا بابا -آغا بابا ؟ خبرین وار؟ خبرین وار؟ هممشه قولاق آسارسان ها ،سمفونی قیرخین جی شوماره –موتزارتیدان، اونو تبریزین فیلارمونیک آدلی ارکستری ،پتروشیمی آمفی تاتریندا ،چالیناجاق .هله بو هاراسی دی ،بیر قطعه ده اوز موسیقی میزدن چالیناجاق. نوه مین الیندن کاغیذی آلدیم اوخودوم ،بلی، دوزودی، اوشاق نئجه دئیردی اوجور یازیلمیشدی.  آمما بیر آیری سوزده یازیلمیشدی ،بیرینجی ردیفدن - بشینجی ردیفه جان  یوز مین قید اولونموشدی ،سکسن - التمیش –قیرخ مینی ده واریدی ،یاپ آخیردا اوتوز مین ،بالکونون آخیر ردیفلرینده تاپیلاردی .اوز –اوزومه فیکیرلشیردیم: آللاه من نئجه ائیله یم، ایه ر بوتون عایله نی آپارسام ،هله آخیر ردیفده بالکوندا اوتوردسام، بو  آی ماآشین یاری سی گئتمه لیدی.
 بو آندا قاپی دویولدی، قونشو  آزاد منطقه ده  ایشله ین مدیریمیزین خانیمیدی.  الینده بیر آلتی دنه بیلیت یوز مین لیق ،قاباق ردیفده واریدی . گولومسوله نه رک، دئدی :کیشییه دئدیم: آلماها !آمما گئدیب آلیب. کیشییه دئدیم: آلما ها !بونون عوضینه یاما گئدک، بیر آز کئیفه باخاق. آمما گئدیب آلیب. دئدی -دئدی سونرا چیخیب گئتدی.
 خانیم ائوه گلنده سوروشدوم :کیمیدی؟ دئدی: نازیلا خانیمیدی. دئدیم: هانسی نازیلا ؟دئدی : او قونشو کی سیز هممشه بو سمفونی دان قویوب، قولاق آساندا ،زنگ آتیب دییه ردی: اونون سین کسین. دئدیم :بس نئجه او بیلیت لری آلیبلار؟ خانیم دئدی: آلیب لاردا ،اودا قاباق ردیفده!
 دوباره دن اوشاقلار دیله گلدیلر: آغا بابا ؟آغا بابا ؟هاچان گئده جه یک ؟ایسته یردیم بیر سوز دئییم، خانیم سوزو آلدی اله ،دئدی: جانیم -جیکریم گئتمییه جه ییک، ائله گئچین اوز سی دی میزی قویون ،هانسین آچیرسیز آچین .بیر آزگئچمه میشدی ،او سمفونی  قیرخ دایدیق، بیر دن زنگ آچیلدی .نازیلا خانیمیدی، اوجا سسله، دئیردی: آغا  بابازا، دئیین: او نه دیر آچیب؟ سن اللاه اونون سسین کسین! من سوروشدوم :کیمدی ؟خانیم دئدی :نازیلا خانیم ،او بیلیت آلاندی !!

گرگرلی آراز

بعضی لری دیل –آغیزسیز حیوانلاردان قاباق کورسه نیر!

یازار : گرگرلی آراز

+0 به یه ن

 

بعضی لری دیل –آغیزسیز حیوانلاردان قاباق کورسه نیر!

 

 

بو ایل قیش برک اولماقدا، قار داغلاردا هر بیر کول - کوسون اوستون اورتموشدی . اوولار داغلاریمیزدا ،کورلوق چکیردیلر. میر عاباس عمی اوغلو ائله خیر ایشلرده ،هممشه قاباغا دوشوبدی، بو ایشده ده قاباقا گئچیب ،هامیدان باشلایب پول ییغدی. سونرا بیر – ایکی نیسان یونجا آلیب، نئچه نفرین کومکلیقیلا ،دره دوزده -اوولارا آپاردیلار. آخیر  جومعا آخشامی او شخصلر کی بو ایشده زحمت چکمیشدیلر، کربلایی ماحمودون حئسابینا، آیران دیبینه گئدیب ،بیر ناهار یئدیله ر.

آمما چوخلاری بیلمیردیلر بو ناهارین پولون، آیری بیر شخص وئریب ، خییال ائیردیلر اووا ییغان پولدان بو حئسابلانیب. اودور کی قرار قویولدی  اعتیراض ائدنلره، باشدا ایسکندر اولماقدا، صاباحی ناهار وئرسینلر. بو آندا کربلایی ماحمود چایخانایا وارید اولدی. حاجی میر عاباس عمی اوغلو گولومسونه رک، دئدی: واللاه دونن کربلایی ماحمود آتاسینین خیرینه -صوابینا بیر بش نفره احسان وئردی، بوسفرده سیزه آناسینین خیراتینا بیر ناهار آلاردا !هامی ساکیت، کربلایی ماحمود سوزه گلیب، دئدی: واللاه ناهار آلماقدا سوز یوخدی، امما رسمیدی کیم اولونو قویلاماقا –یاخوت اونون مچیدینده، فاتحه وئره نه ،احسان یئتیشر.

بوردا داها بیر نفردن سوز چیخمادی ،هامی باشین آشاقا سالدی. امما هردن باش  قوزایب باخاندا ،یالنیز ایسکندرین   اوزونه باخیردیلار. ائله بیل ایسکندر –ایسکندرین یولداشلاری ، اوولارین یونجالارینا  کومکلیق ائیله مه میشدیلر. واللاه نه بیلیم بلکه اوولاردان واجیب، بعضی ایسکندر تک شخص لر اولور !!

 

گرگرلی آراز


ناصرالدین شاهین آغروپا سفری !

یازار : گرگرلی آراز

+0 به یه ن

بو حکایه نی بیر گولمه لی سوزدن گوتورموشه م

 

ناصرالدین شاهین آغروپا سفری !

 

 

گئجه بیر اسه مس گلدی ، اوزوموزه گلن هفته یه حاضیرلاش، آغروپا سفرینه گئده جکسن .اؤزیله ده بیر اوچ نفر اولاجاق. گئجه یارییا قدر یاتا بیلمه دیم ، آللاه کیمی آپاریم -کیم قالسین. ذهنیمدن چوخلاری گئچیردی: دوکتور جئری ؟یوخ جانیم، او دوکتوردی هر شئی یه ایراد چیخارداندی .ائلچی بئی نئجه ؟پیس دئییل ،مسلکی گئنیشلیک دی، بیر تهر آدامیله اوتوشر.حاجی مسعود نئجه ؟یوخ جانیم ،همی قوجادی همده حاجی ،اونون یانیدا بیر ایش گورمک اولماز. اؤز-اؤزومه، دئدیم :سنده حاجی دئییل سن؟ سونرا اؤزومه، دئدیم: حاجی وار حاجی! خیلاصه بش- اون نفر ذهنیمدن گئچیردی، گوردوم تلفن زنگی چالیندی. ساعادا باخدیم گوردوم  اونیکی دی، زنگی آچاندان سونرا گوردوم ائلچی بئی یله- دوکتور جئری دی .نوبتیله بیر- بیر حالیمی سوردولار، آخیردا دوکتور دئدی :اوزون بیلیرسن من بیرینه اوندان اوطرفه زنگ آتمارام ،دئماقیم اودورکی  بیردن چاشیب ائیله رسن، بو بیر کند –شهر سفری دئییل، خاریجی آغروپا سفریدی، گره ک بیر خاریجی دیل –بیرده ادبییاتچی یانیندا اولماقی لازیمدی. اوز- اوزومه  دئدیم: آی سیز اولمییه سیز، سیزی آپاران کیمدی. آمما ایسته مه سمده اونلاری آپارام آپارمارام ،آمما اوراسیندا دوز دئیردیلر، بو آغروپا سفریدی ،بوردا بیر آز چاشیب ائیله سه م ،وای حالیما .سحری دئدیم: بیر اعلان یاپیشدیرسینلار، آغروپا سفرینه بیر ایمتحان آلیناجاق. آخشامی ایداره زامانیندان سونرا بیر- بیر گلیردیلر، منده بیر سوزلری سوروشوردوم، هئچ بیری قبول اولمادیلار. آخیر دورد نفر هامینین یانیندا ،اوتاغیما وارید اولدولار.ایلک  ائلچی بئی دن سوروشدوم: عراقین پایتختی هارادی؟ ائلچی بئی بیر نم- نوم ائیله دی، دوکتورون اوزونه باخدی، دوکتوردا بیر الین یاریمده نه آچیب -یوماندا ،بیردن ائلچی بئی، دئدی: بغدادی ؟دئدیم: ی حرفی یوخدی. ائلچی بئی اوزدن گئتمه دن، دئدی: دئیرم یعنی بغدادی دئیرسیزدا؟ دوز دئماغینا، گئچیب دوردو منیم یانیمدا. دوکتور جئری دن سوروشدوم: پاکیستانین پایتختی هارادی؟ دوکتور جئری تقلب لره باخدی ،گوردو پاکیستانین پایتختی یوخدی، قایدیب ،دئدی: بیر آغروپایا گئدیریک؟ یا آسییا مملکتلرینه ؟دئدیم سنه ربطی یوخدی،سئوالین جوابین وئر. ائلچی بئی بیر اوزیله میزیلدادی، دئدی: آللاه ایسلامین پرچمین آباد ائیله سین .بیردن دوکتور جئری اوشاق تک آتدانیب -دوشدو دئدی: ایسلام آباد؟ دوکتور جئریدن بتر، ائلچی بئی سئوینیردی. اودا گئچیب ،ائلچی بئی ین یانیندا دوردو. ایش یئتیشدی علیریضا رضای یا .اوندان سوروشدوم :سن اوزون بیر پایتخت آدی دئگیلن. بیر بارماغین آغزینا آپاریب ،منیم یانیمدا دورانلارا باخدی، دوکتوریله -ائلچی بئی بیر ادا- اطوار گتیریردیلر، منکی باش تاپابیلمه دیم، امما بیردن علیرضا اوجا سسله، دئدی :قزوین !قزوین !دوردوم آیاغا ،دئدیم: نمه نه ؟!یاواشجا ،دئدی :قزوین !چاره یوخودی، ایسته یردیم آپارام، دئدیم: دوزدی، قزوین بیر زامان پایتخت اولوب. ایش یئتیشدی قدرت ابولحسنی یه .بیر- بیریمیزین اوزونه باخیب، قراریمیز اویودی کی اونو سالاق.  حقیمیزدا واریدی یازیلارینا باخسانیز، کندلرینین هامیسینین اللرینده، شنه –بئل –قازمادان ساوایی بیر شئی یوخدی، آغروپایا گئدسه بلاسیز اولمویاجا ییق! اوندان سوروشدوم: لیختن ایشتایینین پایتختی –ایلک سلسیله سینین پادیشاهینین  –ایندی کی پادیشاهینین – اونون خانیمیسینین آدی نمه نه دی؟ یازیق قدرت دوزلدی یولا گئتسین، سوروشدوم :بس هارا؟ نییه بس دئمه دین؟ قدرت گئده -گئده ،دئدی: کئفلی ایسکندر بیر یوللوق دئیلن سنی آپارمیریقدا، دور- برین گوزل سئچمیسن، چولمک دیغیرلانار، دوواغین تاپار .بیرده کئفلی قارداش عرق ایچندن شاهید ایسته دیلر، بوردا مندن اوز دونده ریب ،یولداشلاریم دوکتور جئریله -ائلچی بئی یه باخیب، دئدی :گئتدی اوزوم آیاغلایانلاری گتیردی !اونلار گتیردیلر آمما سیز آپاریرسیز!!

 

گرگرلی آراز


عسکرین الی قامانده رینین فیکری سایلیر!

یازار : گرگرلی آراز

+0 به یه ن

عسکرین الی قامانده رینین فیکری سایلیر!

 

 

اللی ایل دئدیقیم احوالاتدان گئچیر:حوسینقولی عمی هممشه ایشله مه یه جولفایا، دمیر یولوندا -واگونلارا طرف، گئدردی .واگونلار یونگول اولاندا ،بش- بش آغیر اولاندا، اون نفرلیک دسته یه بولونوب، اونلاری بوشالدایدیلار. جولفا هممشه قیشی برک سویوق اولار. اودا ایه ر سزاقیلا اولاندا، یاپ سوموگه ایشله یه ر. او گونده ائله  دئدیقیم گونلره تای، واگونلارین یوکو شکریدی.یوکو هامیلیقدا  بوشاتمیشدیلار، هره سمرین گوتوروب واگوندان یئره انیردی. حوسینقولی عمی گوردو ائشیک سویوقدی، ایسته دی واگونون ایچه ریسینده پالتارلارین دئیشسین .او آندا ،سمری یئره آتیب ، پالتارلارین سویونوب، تورباسیندان ائشیک لباسین چیخاردیب ،اینینه تاخدی .سونرا ایسته یردی  یئره یئنسین، بیر سالدات قاپیلاری باغلایا -باغلایا گلیردی ،حوسینقولی عمی نی گوردو، ایشارتیله دوشوندوردی : آچ توربانا باخیم. حوسینقولی عمی آچمامیش ایسته دی، بیلیندیرسین: توربانین ایچینده  شکر دئییل ،کوهنه ایش پالتاریدی. اوندا سالدات دوشونمه دن الین قوزایب ،حوسینقولی عمی نین قولاغینین دبین ناللادی، سونرا توربانی آلیب ایچه ریسینه باخیب ، کنارا تولازلادی. حوسینقلی عمی نین بیر الی قولاغیندا، ایلیب ،او بیر سی الیله توربانی گوتوروب، باشین توولایا -توولایا  یولا دوزلدی. دمیر یولوندان چیخیب، یولداشلاریندان کناردا اوتوروب، بیر پاپیروس ائشیب چکماغا باشلادی. یولداشلاریندان بیری یاخینلاشیب ،دئدی: حوسینقلی نه اولوب؟ نییه حالین قارادی ؟حوسینقولی عمی آچیب ،احوالاتی دئدی .سونرا سیگارتینه  بیر اوزون نفس ووروب ، اوزاقلارا باخدی یولداشینا ،دئدی: سالدات ائله بیر منه سیلله ووردو کی ایستالین دن زهله م گئتدی!!

 

گرگرلی آراز


بیر گولده

یازار : گرگرلی آراز

+0 به یه ن

بیر گولده

کربلایینین توکانیندا اوتورموشدوق کی؛ بیر کیشی عائیله سی ایله وارید اولدولار. سؤزلریندن کربلایی بولدوکی، ایکی تخته کند فرشی، اودا بیر گولده ایسته ییرلر. کربلایی بیر بئش - آلتی فرشی اندر-دؤندر ائیله دی؛ار- آرواد ایکیسین به ین دیلر. کیشی فرش تانییانیدی. کربلاییدان مئتری آلیب، فرشلرین اندازه سین هم بوتؤولوکده، همده اورتا گولون و کناردا کی گوللرین اؤلچماغا باشلادی. اؤلچه - اؤلچه بیر پارا سورغولارائیله ییردی؛ اؤرنک اوچون: اورتا گول بیر اوچ سانتی گلیب سولا. گوشه ده سول گول ساغ ایله یئمیر. کنار خطلر بیر - بیری ایله دوز گلیب، توتمور. و بو سؤزلره تایین هئی خبر آلیردی. آخیردادا ائله او ایکی فرشی به یه نیب، بیر آز قیمتین سیندیراندان سونرا؛پولون وئریب آپاردیلار. هر زاد بئله دی. ایسته ییرسن ائوین پرده لرین دییشه سن، اوچ پنجره ن وار؛ اوچونده بیر رانگیدا سئچمه لیسن؛ یادا بیر میز آلیرسان، صندل لرینده اونا تای بیر مودئلده بیر رانگیدا سئچیب، انتخاب ائله یه سن. بوجورانتخابلار گؤزل دوشور.ائوده ده گؤزل گورسه نیر. آما بئله اولمایاندا بیر یارا چیبان تک ائشییه وورور.دوزون دئسک سئت اولمور.هر زاد بئله دی بیر دسته بننا - فهله دی، سکگیز-دوققوز نفری بیر ائوی تیکیرلر؛ او سکگیز – دوققوز بننا- فهله نین آراسیندا ایکی سی سؤزه باخماسا؛ایش قاباغا گئتمز، هئچ. بیر آزدا ایش خارابلاشار.ایش صاحابی گره ک، ائله بیر آداملار سئچیب ایش باشینا گتیره کی، هامینین اعمالی- رفتاری وعقیده سی بیر- بیرایله جور یییه. خیلاصه، آخیر سؤز: قادیندا، دوستدا و ایداره ده رئییس ده، معاوینده بئله دی. حتتا مرکزده وزیرلرده گؤرورسن باش وزیرین رائی ایله انتخاب اولونور. ایشه باشلاییر. هله بونداندا یئکه سی،مرکزده مجلیسیمیزده گره ک بئله اولا. اوندا گؤرنه گؤزل گورسه نر؛ هامیسی بیر فیکرده ، بیر بویدا، بیر یاشدا،بیر مرامدا – مسلکده بیر یئره یغیشالار؛ تا کی بیر ایشی عزیز مملکتیمیزده قاباغا آپارالار.

 

گرگرلی آراز


  • [ 1 ]