بیزیم بو قصابین نقدر ورثه سی واریمیش!

یازار : گرگرلی آراز

+0 به یه ن

بیزیم بو قصابین نقدر ورثه سی  واریمیش!

محلله میزده عماد الدین عمی او ایل کیللرده ،وفات ائتمیشدی .چوخ بویوک عضمت له ،تعزییه سی قورولموشدو. آغالار حیه تین بیر طرفینده ، خانیملار دا بیر طرفده گلیب گئدنلره –قوناقلارین قارشیسینا چیخیب، اوتاقلارا هدایت ائیله یردیلر. خانیملارین طرفی شولوغودی ،هردن بایاتی چکن -هردن بعضی قوناقلاریلا قوجاقلاشیب –آغلاشاندا، اولوردو .

وفات ائدن قصابیدی.  ایکی آروادی اولماقدا بیری فاطما خانیم یوخاری باشدا ،اوتورموشدی.  مستان خالادا آشاغی باشدا اوز باجیلاریله ،بیرده بالدیزیلا ،ایله شمیشدی. دئییلنللردن  معلومودو، ایکی سیغه سیده بیری  شیخ سورا- بیریده سید قیزی سکینه یوخاری باشدا آیری، اوتورموشدولار.اونلار  هردن نوبتیله اوجادان فاتعه سسله یب، چئویریردیلر.

 مجلیسین شیرین یئرینده فاطما خالا ،بیر بایاتی چکدی: (کوینکین آغ ساخلارام) ایسته یردی اوبیرسی مصرع سین دئسین، اوبیرسی اوتاقدان کی تزه قونشو کندیدن گلمیشدیلر، بیر خانیم اوجا سسله، دئدی: (یووارام آغ ساخلارام !) ایواندان بیر آیری دسته کی آیری بیر قونشو کندیدن گلمیشدیلر ،بیر خانیم  اونلارا قوشولوب ،دئدی: بیرده گلسن بیزیم کنده  سنی واللاه (اوزوم قوناق ساخلارام )هیییییییی! فاطما خالا ائله اوجور  چادیرانی اوزونه چکمیشدی،  دییه نلره قولاق آسیردی .بیردن چادیرانی قیراقا وئریب  یانینداکیننان، سوروشدو:  بونلار کیمدی؟ او دوروب گئتدی سونرا ائله او آن قاییدیب ، فاطماخالایا دئدی: ائله بیل رحمت لیک عمادالدین عمی نین قونشودان گلن سیغه لریدی! فاطما خالا آغیر آروادیدی بیر ایسته دی حیرصلانسین، ایلک میددانماغا باشلادی: آی جانیم هله بیز ایکیمیز ،یانیمیزدا ایکی سیغه سی ،هله اوچوده قونشو کندلردن گلیب، آی بونون جیکری یانسین !نه مخلوقوموش نه جاناواریمیش !یانیندا اوتورانلار قویمادیلار دورسون، بیری دلی -نصیحت بیری گئچدی  کوره ین- بئلین اوودولار، قال یاتدی .

مستانین باجیلاریندان بیری مستانا گوز ائیله دی کی یئریدی ، بیر اوجادان بایاتی چک. مستان چادیرانی اوزونه چکدی  ،اوجادان هاراینان اوخودو: عمادالدین هارداسان ؟(یئریوی سالارام ایواندا) عماد الدین( سسین گلیرباخ لیوارجاندا )....بو هی نیده بیر دسته آرواد ایواندان، اوتاقا وارید اولدولار . بیری اوزون یئره چیپدی ، اللرین یئره وورا -وورا اوجا سسله، دئیردی: داها نه دن سسین گلمیر( گله م قاباغیوا داراندا!)

اوخوجولار  ،گوزوز  گورمه سین! بیر دن فاطما خالا دوردو ،چادراسین بوینونا باغلادی، ایلک ال آتدی بیر دسته استکان نعلبکی سینی له  پنجره دن خییاوان آلتینا ،تولازلادی .سونرا ال آتدی ساماوارا ،اونودا اوتاقدا فرشین اوستونده جالایب، ایسسی سویو توکدی، یئریله یکسان ائیله دی .

بیر آز اوجور آیاق اوسته دوروب سونرا ایکی الین داراقلادی  پنچره نین چرچیوالارینا، دئدی :داها تعزییه نی ییغیشدیرین !من ایسته مه دیم بو تعزییه نی! بو تعزییه ایکی گونده ایدامه تاپسا ،بوتون کندیلردن نه مه نه دول آرواد وار، توکولوب بورا گله جکلر!!آی هاراییییییییییییی!!

 

گرگرلی آراز


بعضی یئرده دانیشاندا آدام آبیر – حیادان دوشور

یازار : گرگرلی آراز

+0 به یه ن

بعضی یئرده دانیشاندا آدام آبیر – حیادان دوشور........(دادگاهلاردا بویوک ایختیلاس ائیله ینلره تقدیم اولونور!)

 

 

کاسیب چیلیقین اوزو قارا قالسین. آلقلی  گیلین آتاسی اولنده ،بیر طرفدن کاسیب چیلیق- بیر طرفدنده ورثه نین چوخ اولماغی ،اونلار   بیر هفته تعزییه دن گئچمه میش، بیر- بیرینین جانینا دوشدولر.

اوغلانلاریله -کورکنلر ائوده ، قیزلاریله -گلین لر ائشیکده ،هردن  دانیشیب – دالاشیردیلار.

 خیلاصه هامی باتمان اولوب ،نردواندان یئره انمک بیلمیردیلر. مهدی دئیردی: او گون توکانی آچاندا گوردوم، توکانین قاباغیندا آلقلی ،قارداشی جلیلی توتموشدی دانلایردی، او دئیردی: سنین آروادین چوخ آت اوینادیر، ایسته یرسن  آبیر- حیادان دوشمه یک ،آبیریمیز گئتمه سین، قان توکولوب اورتادا بیری اولمه سین ، جلیل قارداش ،سنده گره ک سلیته وی یئرینده اوتورداسان !منده ایفریته مه جواب وئره م! اوز دونده ریب آلقلی منه ساری ، دئدی:  مهدی قارداش پیس سوزدی، سیز دئیین  پیس دانیشیرام !!

 

گرگرلی آراز


میرزا صمدین ائششه یی

یازار : گرگرلی آراز

+0 به یه ن

میرزا صمدین ائششه یی

داییم آروادی دئیردی: ائوده اوشاقلار اون گونودو بیر -بیریله ساوشیردیلار.هر نه قدر دلیل-نصیحت ائله ییردیم، سؤزه باخماییب؛ گونو گوندن بترله شیردیلر. داها لاپ جانا گلمیشدیم! قونشوموز زرافشان خالا بیزه گلنده اوشاق لارین ساواشینین اوستونه چیخدی. یاخشی اولدو، او بولدو. او دئییردی :او گونلری بیزیمده اوشاقلار سیزین اوشاقلار تک بیر- بیرینه دَیمیشدیلر. گئدیب میرزا صمددن دوعا آلاندان سونرا هامیسی قوزویا دؤنوبلر.

داییم آروادی بئله دئییردی:آخشامی زرافشان خالا ایله، میرزاصمدین توکانیندا اوتورموشدوق بیرنورانی آدامیدی. نه آدامین اوزونه باخیردی، نه ده چوخ دانیشیردی. بیرآلتی بسته دوعا وئردی. ائله ده پول آلمادی. بیر گونلوک فهله پولو آلدی. بونلاری منه دئدی: یادیمدا قالمادی. گتیرمیشم ایسکندراوخوسون. بیرده اونلاری اؤیره نیم.آنام منی سسله دی، گلیب اونلاری اوخویوم.من گلندن سونرا بیر داییم آروادینا باخدیم، بیرده آنامین اوزونه.بیرده دوعالارا نظر سالدیم. سونرا بیر-بیر اوخوماغا باشلادیم.

بیر- بیراوخویوب، یئره قویوردوم.«بونی قویلارسان»، «بونی یئدیرده رسن»،«بونودا حا لوایا قاتیب یئددی تیکه یه بؤلوب وئررسن یئیرلر». «بونودا سودا قاتیشدیریب ایرمی بیر گون؛ او بیریسینده قیرخ گونده قاشیق- قاشیق چایلارینا،یئمکلرینه تؤکوب،ایچدیریب یئدیردرسن»؛ « بونودا خمیره قاتیب وئررسن بیر ائششک یئیر».داییم آروادی ائششه یی ائشیدنده دئدی:دوز دئییر؛ میرزا صمد ده دئدی: بو یئکه دوعانی خمیره قاتیب ، وئررسن ائششک یئیر. سونکی گون داییم آروادی هامیسین یئربه یئر یئرینه گتیرمیشدی. بیر ائششه یین دوعا ایله بارابار خمیر یئماغی قالمیشدی!آنام حاضیرلاشا-حاضیرلاشا داییم آروادی دئیردی: زورلا- بلاایله بیرائششک تاپمیشام؛ شهرده بیر ائششک یوخدو!. فقط دئیرلرگولثومون اوغلونون بیری وار.تیلفون ائیله دیم، قبول ائیله دی کی، آپاراق خمیری دوعا ایله بارابار ائششک یئسین!آنام دئیردی کی گولثوم گیله کی وارد اولدوق، بیر یئددی- سگگیز آدام واریدی! هامیسی دا تانیشیدی. گولثومون گلینی نوبت ایله چاغیریب، خلوت ایله طؤیله یه آپاریردی. بیر یاریم ساهاتدان سونرا چیخیب گئدیردیلر. گئتمه میشدن قاباق گولثومون گلینینه ده بیر شئ لر وئریردیلر.تئز دائین آروادینا دئدیم: گولثومون گلینی یادیندان چیخماسین ها.

بیزیم نوبتیمیز یتیشه نده طؤیله نین قاباغیندا، دائین آروادی گولثومون گلینینه  قاباقجا پول وئردی. اونوندا بیزه بترکومکلییی دَیدی. او دئییردی: خمیری وئرین منه؛ من بولورم اونو نه جور وئریم ائششک یئسین. دوعا یئره دوشمه سین. یئره دوشسه یئرینده اوتورماز. دوعانین اثری اولماز.ائششک گؤزل وجهیده خمیری یئدی! دوعادا اونلا بارابار ائششه یین قارنینا گئتدی! آنام دئیردی: ائششک ائله گؤزل توتوقلانمیشدی کی قارین- بوغازی،قیشلاری،پئیسری او بیرسی ائششک لرایله فرقی واریدی. گولثومون گلینین ائششه یی هم یئکه، همده گؤزل گؤرسه نیردی.

آنام بونلاری تعریف له ینده اؤز- اؤزومه فکیرله شیردیم کی، آدامین بیر میرزا صمد تکین بیریئرده ،ایداره ده، سازیماندا، پارتی اولسا آدامین اؤزوده طؤیله ده ائششه ییده یامان کئفه باخار!!

گرگرلی آراز


اولکه ده هانسی ایشلر منیم اوچوندو هانسی ایشلر یوخ!

یازار : گرگرلی آراز

+0 به یه ن

اولکه ده هانسی ایشلر منیم اوچوندو هانسی ایشلر یوخ!

 

 

 

دونن مهدی نین چایخاناسیندا حاجی رضا دئیردی :گئچن هفته مشهدی رحمان جاماعات نامازین گوزتله یردی، قوتارسین .نامازچیلار مچیدین  پیلکانلاریندان یئننده، اورتالاریندا  آخوندوموزو گوردو. امما گوزتله دی اؤز کوچه لرینه دونسون. دونن آن، مشهدی رحمان اونون  قاباغین کسیب ،سلام وئردی .حاجی میرزا حسن چوخ مهربانچیلیقیله رحمانیله گوروشوب، احوالاتین خبر آلدی. چوخ سوزدن سونرا، گزه- گزه حاجی له  قاپیلارینا یولا دوشدولر. یولدا مشهدی رحمان آچیب مطلبین، دئدی:منیم آغام چوخ عذر ایسته یرم نئچه واقتی بیزیم عورت اعمالین یئرینه گتیرمیر،نامازلارین قیلمایر !

 حاجی میرزا حسن :استغراللاه ،نییه آخی ؟

مشهدی رحمان:بولمورم کی

 حاجی میرزا حسن :بیر دلی نصیحت ائیله گینن ،بلکه دینه -ایمانا گلدی او قیزی من تانیرام مشهدی  فضلعلی نین قیزیدی، دین -ایمانلی عایله دندی.

مشهدی رحمان :اوزومده دلی -نصیحت ائیله میشم ،حتتا آنامدا -آناسیدا گون اولمایب کی اوزون دانلاماسینلار.

 حاجی میرزا حسن:اونو بعضی شئی لریله توولا. میثال اوچون بیر چادیرالیق – دونلوق آل، بلکه ایپه -ساپا گلدی.

مشهدی رحمان :آلمیشام ،نقدر دئسه ز بو ایشلردن گورموشم،حتتا  بو تزه چیخیب مانتولارداندا آلمیشام،کار وئرمه یب.

حاجی میرزا حسن داها ائولرینه یاخینلاشیردی، سوزه آخیر کلامی وئرسین ،دئدی :مشهدی رحمان  بس بونون آخیر سوزو- منظورو نه دیر؟ هئچ بیر سوز دئمیر؟اوندا مشهدی رحمان  الین آپاردی اوزونه، ایکی بارماغین بورنونون ایکی طرفینه یاپیشدیریب، اوچ بارماقیله چنه سین توتوب، دئدی: منیم آغام، نییه دئییر. مشه خججه دئییرکی:  سنده نامازلارین قیل ! منده قیلیم!  ائله بو ایش ناماز قیلماق منیم اوچون دئییل کی!!

 

 

گرگرلی آراز


سککیز یاریم اخباری

یازار : گرگرلی آراز

+0 به یه ن

فیتیله برنامه سینین  آپاراجیلارینا تقدیم اولونور

 

سککیز یاریم اخباری

(آپاران :دوکتور جئری)(چوخوردان کناردان  آپارانی:ائلچی بئی)(بیردن باش وورما آپارانی :کئفلی ایسکندر)

سلام....

 سیز بو ساعات بوتون دونیانین – اولکه میزین اخبارین ائشیده جکسینیز. سونرا  چوخوردان کناردا (خارج از گود )-بیردن باش وورما (سرزده )خبرلرین ، حضوروزا چاتدیراجاغیق .

ایلک  اولکه میزین خبرلری

1-بیر دادگاهلارین بویوک شخص لرین طرفیندن ، خبر وئردیلر:ایندییه جان  دادگاهلاردا ایاق یولونا چوخ فیکیر وئریلمه میشدی .اودا بوندان اوتور اولموشدو، اوردا  هئچ ایاق یولونا فیکیر گئتمیردی، هامی جان هاینا قالمیشدی. بوندان سونرا قورخو گوتورله نیب، داها  ایاق یولو لازیم اولاجاق.

2-بویون مجلیسیمیزده بئله بیر دانیشیق واریدی. بوتون مجلیسده اولان  ژورنالیست لر اعتیراض ائدیردیلر: مجلیسین  ایاق یولولاری ،مجلیس آچیلان  موقعی، باغلانیر. یالنیز  ایاق یولولار دئپوتاتلارا عایددی. اونلاری  هئچ اولماسا بیر  یاریم ساهات بیزه گوره ، آچیق قویالار .

3-بیزه خبر گلدی چاتدی کی دونن، جمهور باشقانی سارای یندا، تله سیک بیر اونده نه خارجی ایاق یولو قوروب- ایشله دیللر. آغروپادان بو هفته بیر قوروپ  دئپوتات دانیشیق اوچون، اولکه میزه  گله جکلر.

4-اوستانداریدا تاکید اولونوب : اوستاندارینین قاپیسین  آچمامیش ایاق یولولارین قاپیسین آچالار.  دووره همسایالار اوستاندارییا  بو باره ده شکایت گلیب .

(خبرلری اوخویان بیر – بیر  ورقلری  اوخویور  قویور کنارا )فرمانداریلارین ایاق یولوسو...- بخش دارینین ایاق یولوسو... –شهرداریلارین ایاق یولوسو ...–شورالارین ...–دهداریلارین ایاق یولوسو... )عزیز دینله یجیلر – گورنلر، ایندی گئچک  خاریجی خبرلره .

خاریجی خبرلر

 

1-سورییه ده بیر ایاق یولو قالمایب ....بیزیم آلدیقیمیز خبره گوره  بو باره ده  قاچقینلار چوخ چتینلیک چکیللر .

2-لوبناندا بو ایل یوزه  اوتوز بش ایاق یولو چوخالیب .....

3-آلماندا – ایسکاندیناوی  اولکه لرده-اسپان یئرلرینده  چوخ  حیاسیزجا ،ایاق یولو لارین یوللارین، دنیزه اوتوروب،  دنیزلری  بو کثافتلریله بولاشدیریب،  باتیریللار

4-دییه نلره گوره  هله بویونه جان  آ.ب.ش (آمریکا بیرلشمیش شتاتلار)دا بیردنه ده اولسون ایاق یولو یوخدو.

 

چوخوردان کناردا(خارج از گود )خبرلری

خبر منبع یمیزدن وئردیی خبره گوره بوتون فیدراسییون لاردا  تامام ایاق یولولار توتولوب . ایندی چوخوردان کنارلاردا  گئدیب اوتوروللار .

 

بیردن باش وورما (سرزده )خبرلری

 

بیزیم توتدوقوموز خبره گوره  ،بوتون ایداره لرده – سازمانلاردا  ایاق یولولارین  قاپیسی باغلانیب . کلیدی  رئیسین اوتاغیندا دیواردان آسلانیب .

بویون  بو ساعاتدا  بو خبرلر ......اومیدوارم کی اولکه میزین – دونیانین مهم خبرلرین  ائشیدیب  قولاق آسدینیز.... ساغ قالین !

 نه دئییم واللاه دوکتور جئری –ائلچی بئی  - کئفلی ایسگندرین خبر دئدیی بوندان آرتیق اولمازکی!!

 

 

گرگرلی آراز


قانونلاریمیز نه یه باغلیدی!؟

یازار : گرگرلی آراز

+0 به یه ن

قانونلاریمیز  نه یه باغلیدی!؟

 

 

حسن دئیردی: بیرگون تبریزده، آذربایجان مئیدانیدا ، جولفا کاراژیندا منیم نوبتیم یئتیشدی .ماشینیمی  دالیدان گتیردیم، قاباقدا دایاندیردیم کی گلن موسافرلربیلیب، گئچیب  اوتورسونلار .بو هی نیده دورد نخجوان خانیمی اؤز وسایلیله تاکسی دان یئنیب، اوردا دورانلاردان سوروشدولار، نوبت کیمیندی؟ منی کورسه دندن سونرا ،وسایل لرین قویوب ،گئچیب  اییله شدیلر.

 اوچو دالی صندلده بیری  قاباقدا اوتوردو. آللاهی بیر دیلیمده اوجادان آد آپارماقیله  ،ماشینی ایشله دیب یولا دوشدوم. یول  پولیسینه  یئتیشمه میش اوز توتوب قاباقداکی خانیما ،دئدیم: خانیم ایه ر ممکن دی کمریزی باغلاین. اینتیظاریم واریدی کمرین باغلایا، آمما باغلامادی هئچ ، دونوم منه ساریدا باخمایب  بیر سوز دئمه دی .

بیر آز گئچمه میشدی بیرده دونوب ،دئدیم: خانیم زخمت اولماسا کمریزی باغلاین، باغلاماساز  یوخاری جریمه سی وار. گوله- گوله ،دئدی :بیلیرم آمما باغلامیرام. بیرده کی سیزین نه ایشیز بیر سوز یاخوت جریمه ائیله سه لر ،من جواب وئررم .

خیلاصه گئد به گئد  اؤز ایچیمده چوخ ناراحاند اولوردوم، تاکی بیر ایستگاهی گئچیب بیر آز نفسیم آچیلدی. بیر ایستگاهیدا گئچمیشدیم آللاه -آللاه ائله ییردیم آخیر ایستگاهیدا گئچسه یدیم، یاخام قورتولاردی.

 آمما بو اولمادی منیم ماشینی می ساخلادیلار. حتتا بیزی یئره اندیریب ، ایچه ری گئچیتدیلر.چوخ سوزدن سونرا ایسته دیلر اؤز جریمه سین یازسینلار ، قاباقداکی خانیم بیردن عسکره قایدیب، دئدی: نئجه اوره ین قبول ائیله یر بو سینه ده کیله رین اوستونه او کمری باغلاددیراسیز؟!!

 

گرگرلی آراز


  • [ 1 ]