نجف عمی نین گوللو تومانی!!
یازار : گرگرلی آراز
+0 به یه ن
نجف عمی نین گوللو تومانی!!
بیر گون دمیرچی دوستومون یانینا گئتمیشدیم، دمیرچی دوستوم اؤز خاطیره لرین گوزلجه سؤیله ین بیر آدامیدیر. او منه چوخ سؤزلر دئمیشدی، آما بیر خاطیره سی هئچ واخت یادیمدان چیخماز. دمیرچی یادیما دوشنده اونون خاطیره سیده یادیما دوشر.
اونون خاطیره سی بئله یدی:
بوتون کندلرده، یاز باشلاناندا بو ایش بیر عادته دؤنوب. زمیلری سووارماق واختی اولاندا، کند اهلی بؤلوشوب، چئشمه دن زمیلره دک آرخلاری آریدیب، تمیزله یرلر. یئددینجی گونودور. نؤوبه بیزیم کوچه نینیدی. دوققوز نفریدیک؛ ایکی یوز مئتیر ائل آرخیندان آردیدلاییب، تمیزله یه جه یدیک. منده آتامین یئرینه گئتمیشدیم؛و نجف عمی ایله ایشله ییردیم.نجف عمی یئتمیش یاشیندا، آریق، جیلاز، بوغلو- ساققاللی،آز دانیشان وبرک ایشله ین بیر کیشییدی. عادلریندن بیری بو ایدی کی، ایش باشینا یئتیشنده همیشه پنجه یین، شالوارین، کؤینه یین اَینیندن چیخاردیب؛ تمیز بوکوب؛ بیر آغاجین هاچاسینا قویوب؛ سونرا زیر شالوارین اَتکلرین جورابلارینین آلتیندا بوغوب؛ اَللرینه توپوروب؛ بسم الله دئییب؛ باخیب یولداشینین اوزونه؛ ایشه باشلایاردی.
او گون من چوخ یورغون ایدیم. نجف عمی منی بیر یومشاق یئره سالمیشدی. اؤز حالیمدا ایشله ییردیم؛ هاوا یاواش- یاواش ایشیقلانیردی. گونش داغین بؤیروندن بیر بالاجا اؤزونو نیشان وئردی. منیم قیریشیغیم آچیلدی. آیاغیمی بئلین لاپاققاسیندان گوتوروب؛ اویان- بویانا باخدیم. هامی ایشله ییردی. دالی دونوب؛ نجف عمی یه باخدیم؛ او همی اؤزونه اوخویوردو؛ همیده اَلی- آیاغی ایکی منجه چالیشیردی. آما نجف عمیده بیر شئی گؤردوم کی، منه چوخ گولمه لییدی. گؤزلریم کلله مه چیخدی. ائله بیل قمیش کیمی قوروموش جانیم قاشینیردی. گوله- گوله نجف عمی نی ایشدن دایاندیردیم. او مندن سورشدو: هه دمیرچی نه اولوب؟ نه گؤرموسن؟ اوزون بارماغیم ایله اونون اؤزونه اشاره ائله دیم. اوست- باشینا باخاندا، بیلدی کی؛ ایشه گلنده اؤز تومانینین یئرینه، آروادی خججه نین تومانین گئییب! اودا نه تومان! پاچاسی گئن، قیرمیزی چیت، بوتون گوللر و رنگلر اونون اوستونده واریدی. بیرده کی سول قیچینین اوستونده آیری رنگده بیر جیب واریدی، زیپی چکیلمیشدی. یازیق نجف عمی! بئلی بوراخیب؛ یوموشوب؛ اوتوردو یئره. اویان- بویانا باخیب؛ دئدی: یاناسان خججه، یاناسان سنی!
اشاره ایله منه دوشوندوردو کی، پالتارلاریمی گتیر. گتیردیم. ائله اوتوردوغو یئرده، گؤج ایله اونلاری اَینینه تاخیب؛ دوردو آیاغا.
دئدی: دمیرچی!
دئدیم: هن نجف عمی!
دئدی:دمیرچی! سن نه گوردون؟
«سن نه گؤردونو» دئیه- دئیه؛ گؤزلری بیر یانا اَییلیب؛ بیر اَلی وورماق اوچون گؤیه گئتدی.نجف عمی نین گؤزلری بیر طرفه دؤننده؛ کند اهلی، اؤزللیکله خججه خالا یاخشی بیلردی کی؛ او ایتی له شیب. بیر شئیی آدامین باشیندا سینمالیدیر.
بو سؤزلری دئیه- دئیه بوینوم کئچمیشدی اونون اَلینه. بیر آز بارماقلارین آچدی، نفس یئریم آچیلدی.
دئدیم:هئچ زاد گؤرمه دیم.
بیرده سوروشدو، دئدیم:نجف عمی گئتدییین مقدس مشهده آند اولسون؛ من، خججه خالانین تومانین سنین اَینینده گورمه دیم!
برک آند ایچمه ییمه گؤره؛ منله ایشی اولمادی. آما ایندی دک بئش- آلتی سئری نجف عمی دن کؤتک یئمیشم. بیردن اوز به اوز چیخاندا؛ یولداشیم اونا باخیب گولنده، نجف عمی اونون گولمه سین مندن گورووب، منی بیر دیرناقدان گئچیدردی.
آما بونو دئییم سیزه:
هامینین بیر گوللو تومانی اولوب؛ اودا شانسینا قالیب؛ چیخا ائشییه؛ یا، قالا ایچریده.
یازیق نجف عمی! دمیرچی اونون گوللو تومانین، اؤز کندی هله هئچ؛ قونشو کندلره ده تعریف ائدیب.
بعضیلری گوللو تومانین سؤزون اوردا- بوردا و بعضیلری قوخمادان، گوللو تومانین سؤزون طرفین اؤز یانیندا تعریف ائله ییرلر.
آما من بو کربلایی معصوما مات قالمیشام!!!
چونکو او او همیشه ائشییه چیخاندا؛ گوللو تومانین اؤز شالوارینین اوستونه چکیب، چیخیر ایشییه!!!