قیل کؤرپوسو

یازار : گرگرلی آراز

+0 به یه ن

قیل کؤرپوسو

 

صفدر معللیم، بیر گون ساهاتی یوخولو اوخوموشدو؛ اونا گؤره او چؤره ک خانایا بیر ساهات تئز گلمیشدی. خمیر ائله ییب؛ تندیری سوپورندن سونرا، اوتوروب، بیر چایلاشدیق. سؤز اویان- بویانا گئدیب، صفدر معللیمین کوردوستاندا سیپاهی دانیش اولدوغو گؤنلره چاتدی. او بئله سؤیله ییردی:

بیر گون کتده ایدیک، دئدیلر کاک عبدالله دونیادان گئتدی، ائو ییه سی منه دئدی: صفدر معللیم سنینده گئتمه یین یاخشی دوشر؛ بیرلیکده گئدک.

او زامان یئتیشدیق کی، قبیر قازیلیب، اؤلونون یویولماسیدا قوتاریردی. بیر آز دایاندیق. اوچ- دؤرت نفر اونا خلعت بیچیب، و کفن ائله ییردیلر؛ بیردن بیزیم یانیمیزدا دورانلاردان بیری ائوه ساری قاچدی. او بیر آز سونرا اَلینده بیر اوچ اولدوز صابین ایله قاییدیب؛ اونو کفه نی باغلایانا وئردی؛ اودا صابینی آلیب، قویدو اولونون آیاقلارینین آلتینا، و سونرادا کفه نین اوجلارینی باغلادی.

اؤلو نامازی قیلیندی؛ اؤلو قبیره تاپشیریلدی؛ و بیر فاتیحه دن سونرا بیزده ائوه ساری قاییتدیق.

یولدا حاجی عوثماندان خبر آلدیم؛ حاجی عوثمان! من بو ایشلرین هامیسینی باشا دوشدوم؛ چوخو ائله بیزیم دبلریمیزه تایدی؛ آما بو، اؤلونون آیاغینین آلتینا صابین قویماغی باشا دوشمه دیم؛ او نه اوچوندور؟!

دئدی: بو صابین قویماق چوخ گرکلی بیر ایشدیر. قیل کؤرپوسون ائشیتمیسن؟ دئدیم: ائشیتمیشم، آما یانی نه اولسون کی؟

:صابین اوندان اؤترودور کی، اؤلو قیل کورپوسونون یانینا یئتیشنده، تئزجه نه زوووب، اورادان کئچسین.

او زامان حاجی عوثمانین بو سؤزوندن بیر زادلار باش چیاخارا بیلمه دیم. آما تازالیقدا بو ایشین  سیررینا ال تاپمیشام.

و ایندی اینانیرام کی صابین اؤلونون یانیندا، اونا غوسلداندا واجیب اولور کی هئچ؛ بلکه اوندان قاباغادا دوشه بیلر. چونکو ایشین لاپ چتین یئری قیل کؤرپوسوندن کئچمکدیر، و غوسل، ناماز، ،کفن، فاتیحه... هئچ بیری بورادا اؤلونون دردینه ده یمیر. قیل کؤرپوسونده، اوچ اولدوز صابینین یئرین هئچ زاد وئرمه ییر. آمان بو قیل کؤرپوسوندن!

 

آلتی آی بوندان قاباق قیچیمین آغریسینا کؤره خسته خانادا جرراحلیق اولوندوم. ایکی- اوچ ساهات جرراحلیقدان سونرا، هوشه گلدیم. چوخ آداملار گلمیشدی. هم کاغیذ قوحوملاری؛ همده قان قوحوملاری.

دوستلاریمداندا بیر نئچه سی گلمیشدی؛ «رشید» ده گلمیشدی؛ اورادا نوخوش منیدیم؛ آما هامی بیرینجی « رشید» ه باخیب، اونا سالام وئریردیلر؛ سونرا منیم کئفیمی سوروشوردولار. دوزو منیم اؤزومونده دردیم یادیمدان چیخمیشدی. چونکو منیم گؤرمه ییمه « رشید» گلمیشدی. اونون گلدییینه گؤره من هامییا پوز وئریردیم. آخی او بؤیوک مقاملی، و روتبه سی اوجا بیر آدامیدی.

«رشید» ین گلمه سینی اورانین پرستارلاری ائشیدیب، خسته خانانین باشکانینا ودوختورومادا خبر وئردیلر. اون دقیقه دن سونرا رئییس،دوختور و پرستارلار بیرگه منیم یانیما یئتیردیلر.آدی مینم کئفیمی سوروشوب، اؤزلرین «رشید» ین گؤزونه سوخوردولار. «رشید» بیر بونو سوروشدو: بیزیم بو خسته نین دورومو نئجه دیر؟ و اونو خسته خانادان هاچان بوراخاجاقسینیز؟

دوختور منه گؤره بیر نئچه سؤزلر دانیشیب، سونرادا بیر نوسخه یازدی. رئییس تئزجه نوسخه نی آلیب وئردی پرستارا، دئدی: فیکرینده اول!

پرستار تئز قاچدی، داوالاری گتیرسین.

 

رئییس آخیر سؤزه گلدی: آغا« رشید» سیز بونا گؤره فیکیر ائتمه یین. سیزین خسته نیزین حئسابی وئریلب. ساباح ائله یه بیلر ائولرینه گئتسین.

 

نه جرراحلیق پولو، نه خسته خانا پولو، نه تخت پولو، نه درمان پولو، هئچ بیرین بیزدن آلمادیلار!

چونکو بیزیم ده اؤلوموزون آیاقلارینین آلتیندا بیر اوچ اولدوز صابین واریدی؛

قیل کؤرپوسونه یئتیشنده، اورانی زوووب گئچدی.


گرگرلی آراز


قره له مک!

یازار : گرگرلی آراز

+0 به یه ن

قره له مک!

 

 

منیم دوستوم فتح عالی ،دئییردی :بیر گون پولوموز قورتولموشدی ،بیر یئره گومانیمیزدا گئتمیردی. قیش اولماقدا چول-چوونده ده بیر شئی لر ،یوخودو.

 بیر گون چوله عمی مین ائششکیله زمی میزه کول آپاراندا ،ذهنیمه بیر فیکیر دوشدو. آخشامی ائودن بیر قاب قره رنگ کی قویونلاریمیزا  نیشان وورماغا آلمیشدیم ،گوتوردوم ،یولداشلاریملا بو آغ ائششکی قره رنگیله بویادیق، آپاریب یولداشیمین تویله سینه سالدیق. سونرا هاراسان ائوه قایدیب  ،های –کوی سالدیق :ائششکی باغدا قوردلار پارچالادیلار .

صاباحی عمیم پول وئردی ، گئدیب مال بازاریندان بیر ائششک آلاق  تاکی کول لری چوله داشییا بیلک .  ائرته سی  ائششکی تویله دن چیخاردیب ائشیکه گتیرنده ،عمی می سسله یه رک کی :گلین  گورون  نئجه ائششک دی.عمیم گلیب بیر ائششکین اویان –بویانینا، بئل –بوغومونا باخیب، بیر عیب چیخارتمادی. سونرا عمی مه بیر بهانه یله دئدیم :سیز بویون باغ -باغاتا کولو داشیرین ،بیزیم مدرسه ده ایمتحانیمیز وار. عمیم ایشیم  اولماقدا، اودا راضی قالدی .

 ائششکی عمیمه تحویل وئریب ،اوزوموز پولی خشله مگه گئتدیک .بیر -ایکی گوندن سونرا عمی میله راسلاشاندا ،عمیم، دئدی :آی فتح عالی ائششک غریبه ده اولسا ،ائله بیل اون  ایلدی بو قاپیدادی.ائششکه  کولی یوکله یندن سونرا دوز باغا گئدیر ،باغداندا دوز ائومیزه گلیر، اؤزو قاپینی آچیر، اوزو تویله یه گئدیر!فتح عالی ائله آغ –قره سی فرق ائیله میر!

 فتح عالی ماجرانین دالیسین دییه نده بوردا بیر دایاندی، سونرا دئدی: عمیمه بیر سوز تاپیب دییه نمه دیم، الیمی چنه مه قویوب، دئدیم :اولاردا!بعضی ائششک لر آغیللی اولار، بوردا بیز شانس گتیرمیشیک !یادا ائله ایندی کی ائششک لر بئله  آغیللیدیلار!!

 

گرگرلی آراز


کم*

یازار : گرگرلی آراز

+0 به یه ن

اوشاق شعری

کم*

تورک لرین  طایفاسیندا

بیرده  کم لر  اولوبدی

بارلیقادا *  چای گئدیر

کم ده* بالیق دولوبدی

 

کیمیری لر –ساقالار*

بیر عصریده یاشارمیش

هردن بیر باریشاردی

هردن بیر قاریشارمیش

 

قافقازدان گئچیب گلر

اونلار آذربایجانا

آخشری* زامانیدا

آشوری قاتار قانا

 

تورک کیمیک لرده دئسک

بیر داش وار اؤزلرینده

گویدن یاغیش یاغدیرار

یالوارسا سوزلرینده

 

ایندی کم ی تانیدیق

گئچک کمچی* داغینا

گرگردن خاروانایا

کمتال*جننت باغینا

 

اوردان دوروب باخارکن

کمالا*بیر سلام وئر

دئیین بورا گوزلدی

جننت آذربایجان یئر

 

گرگرلی آراز

.......................................

1-کم-تورک طایفا آدیدیر

2-بارلیقا-اورتا آسییادا هم اولکه همده چای آدیدیر

3-کم-بیر چای آدی

4-ساقالار-تورک طایفا آدی-سکالار-اسکئیت ده دئییرلر

5-آخشری –ماننا پادیشاهی

6-کمچی –گرگر یاخینلیغیندا بیر داغ آدیدیر اته کینده شمال طرفینده آرازا ساری داران کندی یئرله شیر

7-کمتال-خاروانانین یاخینلیقیندا بیر گوزل داغ آدیدیر

8-کمال-سهندیده داغ آدیدیر


اوتوز- قیرخ ایلدن سونرا بانلاماق!

یازار : گرگرلی آراز

+0 به یه ن
اوتوز- قیرخ ایلدن سونرا بانلاماق!



دوز قیرخ ایکی ایل اوستوندن کئچیر؛ کیلاسدا،اوچ- اوچ، دؤرد- دؤرد اوتوراردیق. ائله بیل دونن ایدی، اوچونجو سیرادادا بیز اوتورموشدوق.معللیمیمیز درسی دئییب، اؤز یئرینده اوتوروب، ائشییه باخیردی. بیزده سسسیز دن، گاه معللیمه، گاهدا پنجره دن ائشییه باخیردیق. قار یاغمیشدی، هامیمیز سئوینیردیک. چونکو گلن زنگ ورزیشیمیز واریدی، و بیز قار گولـله سی اوینایاجاغیدیق. زنگ وورولدو. بیر آز دینجه لندن سونرا هامیمیز دؤزومسوزلوک ایله ورزیش معللیمین گؤزله ییردیک. او کیلاسا گیردیکده هامیمیز آیاغا قالخدیق؛ اوتورون، دئدی. اوتوردوق. معللیم باشلادی: اوشاقلار، بویون ائشییه گئتمه یه جه ییک؛ و ائله کیلاسین ایچینده ورزیش ائده جه ییک! بو سؤزو ائشیده رک، هامیمیزین قول- قانادیمیز سیندی.


بیر آز دئییب- گولمکدن سونرا دئدی: ایندی باشلایاق ورزیش ائتمه یه. هامیمیز هویوخموشدوق! نئجه ورزیش؟

معللیم باشلادی:

اوشاقلار! سیز ایندی بیر بیر بانلایاجاقسیز! یانی خوروز سسی چیخارداجاقسیز! منده سیزین بانلاماغیزا گؤره، سیزه ورزیش نومره سی وئره جه یم! بللی دیر کی هانسینیز یاخشی بانلاساز، یاخشی نومره آلاجاقسیز!

ائله حسین دن باشلایاق.

حسین! بانلا گؤروم؛ او بانلاماغا باشلادی، چونکو او بیرینجی بانلایانیدی؛ هامیمیز، اونا گولدوک! معللیم اؤزوده گولدو!

معللیم دئدی: پیس بانلامادین؛ سن 15 آلارسان!

تقی ده، پیس بانلامادی؛ اودا 16 آلدی.

13 آلان، 10 آلان، 18 آلان دا واریدی! تویوقچو حسینین نوه لری هامیدان یاخشی بانلادیلار! اونلار 19 آلدیلار.

نوبت مهدی یه یئتیشدی؛ مهدی بانلاماغی ائله اوزاتدی کی، هامیمیز گیج قالمیشدیق!معللیم دئدی: ساغ اول مهدی! بودا 20! حاققیندی؛ گؤزل بانلادین!

منده 16 آلدیم!

نوبت حبیبه یئتیشدی، هامی گؤزله ییردی کی او نئجه بانلایاجاق!

حبیب ها زور وئردی، بانلایا بیلمه دی! او یالنیز بیر دورتمه ده مهدی یولداشیندان یئدی! اَده بانلا! بانلاماسان نومره یوخدو ها!


معللیم دئدی: حبیب! بانلا، بانلاماسان، ورزیشده تجدید اولاجاقسان!

او زاماندان دوز قیرخ ایکی ایل سوووشور. مهدی ده، منده، حبیب ده بیر اداره ده یدیک، سحر یئمک یئییردیک. حبیب بیردن قاییدیب دئدی: بو تازا رئییس، اؤزون برک توتور! بللی دئییل هارانین نوباریدی؟ بیزی تاخیب شیشه، توتوب تندیره.

بیلمیرم هانسی جانی یانمیش بو سؤزو رئییسین قولاغینا چاتدیریر!

او آی رئییس اونون آیلیغیندان بیر آز کسمیشدی! حبیب نه ده نین سوروشماق اوچون، رئییسین یاناینا گئدیر!

رئییس اونا بیر جومله سؤز دئییر:

حبیب! ائله بیل اوتوز- قیرخ ایلدن سونرا بانلاماغی اؤیره نمیسین؟


گرگرلی آراز


مدیرلریمیز اوخوماسینلار پیس اورگشمه سی وار!

یازار : گرگرلی آراز

+0 به یه ن

مدیرلریمیز اوخوماسینلار پیس اورگشمه سی وار!

 

هممشه بو سوز واردی کی، دییه للر: بو ایمامزادالاردان بیر شئی لری گوتورولسه -اوغورلانسا او اوغورلانمیش شئی لر، اوغورنون بدنینه یاپیشار،اوندان آیریلماز.

حتتا بیر سفر قونشوموز توکذبان خالا، دئییردی: بیرنفراوغرولار جرجیس پیامبرین مرقدیندن بیر –ایکی مس قازانیله -بیر قاپی گوتورموشدولر. اوغرولار گلیب مقصده چاتاندا قاپینی –مس قازانلاری ایسته یرلر یئره قویسونلار، قاپی- مس قازانچالار یئره قویولمور، قاپی اوغرونون بئلینه مس قازانچالار اوغرولارین باشلارینا ،یاپیشمیشدی .تزه دن او اوزون یولو قایدیب جرجیس پیامبرین مرقدینه یئتیشن آن ،مس قازانچالار- بیرده قاپی اوغرولارین بدنلریندن آیریشیر، اوغرولار اونلاردان آیریشاندان سونرا قویوب قاچیرلار.

 حتتا بو سوزلری بیزیم توکذبان سهلیدی، مدرسه ده آغا موعللیم نن-ائوده بویوک حقان ننه مدن –منبرده آخوندلاریمیزدان ائشیدمیشیک .داها  اوجور قاپیلار- مس قازانلار لازیم اولموور.ایندی بو زاماندا داملاردان ماهواره لرین ائلمبی سین، کومیته نین صاندیقیندان ساققیزلی میلیله پوللارین اوغورلاسالار،گوره سن اوغورلارین هارالارینا یاپیشار، تاکی بوبیرسی لره عیبرت درسی اولا!!

 

گرگرلی آراز


بعضی سوزلری اوجادان سسله مه ین!

یازار : گرگرلی آراز

+0 به یه ن

بعضی سوزلری  اوجادان سسله مه ین!

 

 

بیزیم کندیده، آشاغا مئیداندا ،حاجی بابا گیلین محلله سینده ،هانسی آلیش-وئریشچی گلیب سسله ننده، حاجی بابا ائوده اولاندا ،ائودن چیخیب هارایداد ائیله یب ،اونو محلله لریندن چیخاردایدی .اونو قویمازدی اوردا آلیش-وئریشه باخسین.

 بیر گون حاجی بابا داغدا سوروده اولاندا ،گیل ساتان سسله یه -سسله یه محلله یه قدم قویور .آروادلار بیر- بیر چیخیب ،اونلاردان آلیللار .آمما حاجی بابا نین خانیمی گیللری بئگنمیر ،گیل ساتانا ،دئییر: گلن هفته گیل گتیرنده منه او گوی گیل لردن  گتیررسن ،منیم ده آدیم سریه دی ،سسله سن گله رم.

 گلن هفته گیل ساتان محلله یه قدم قویان آن، بیر سسله یردی :آی گیل آلان !بیرده سسله یردی :سریه !گوی گیلین گتیرمیشم ،گل آپار !

حاجی بابا ائوده یدی ،گورور ائله گیل ساتان بیر سفر، سسله یر: آی گیل آلان، بیر سفرده سسله یر:سریه !گل ،گوی گیلین آپار .

حاجی بابا تویله قاپیسینین قاباغیندان، آغاجی گوتورور ،محلله یه چیخیر.اؤز -اؤزونه دئییردی :من بیر آلیش- وئریشچی نی محلله یه قویمورام بو آلیش- وئریشچی هله منیم آروادیمین آدینی  سسله ییر!!

 

گرگرلی آراز


در کوچه سار شب

یازار : گرگرلی آراز

+0 به یه ن

در کوچه سار شب

 

درین سرای بی کسی کسی به در نمی زند

به دشت   پرملال  ما  پرنده  پر نمی زند

 

یکی ز شب گرفتگان چراغ بر نمی کند

کسی به کوچه سار شب   در سحر نمی زند

 

نشسته ام در انتظار این غبار بی سوار

دریغ کز شبی چنین سپیده سر نمی زند

 

گذرگهی ست پر ستم که اندر او به غیر غم

یکی صلای آشنا به رهگذر نمی زند

 

دل خراب من دگر خراب تر نمی شود

که خنجر غمت ازین خراب تر نمی زند !

 

چه چشم پاسخ است ازین دریچه های بسته ات؟

برو که  هیچ کس ندا به گوش کر نمیزند !

 

نه سایه دارم و نه بر ،بیفکنندم و سزاست

اگر نه بر درخت تر کسی تبر نمی زند.

 

از کتاب سیاه مشق – هوشنگ ابتهاج -سایه


الهی بو ایشه نه دئمک اولار !

یازار : گرگرلی آراز

+0 به یه ن

 

الهی بو ایشه نه دئمک اولار !

 

گئچن ایللرده ،آتاسیندان یئتیشن مال-دوولتی علی بیر اتوز  ایلده ساتیب -سوووب قوتارمیشدی، سونرا ناچارچیلیقدان بیر چوخ آلچاق دوولت ایشینه یازیلیب بیر آز مددتدن ساوایی هوشه گلیب آییلمیشدی.او گون ائوده  اصل سند-قباله لره باخاندا گوردو حاجی علی یه ساتان یئر ،گول تپه ده ائله بیل اولچوسو آز حئسابلانیب .

سندلری گوتوروب حاجی علی نین یانینا گئدیر،دئیر:حاجی سیزه ساتان یئری اون-بش باتمان آدینا ساتمیشام ،آمما گئدیب اورانی تزه لیکده اولچموشم، اون –یئددی  باتماندی .حاجی دئدی:علی اورانی من اییرمی ایلدی فیروزا ساتمیشام، من اونا نئجه دئیم :گتیربیزیم یئرین تفاووتین وئر.چوخ دئیب آز ائشیتدیلر، قباله ده بیر دویون آچمادی، اوردا بیر قواره یازیلمیشدی .

خیلاصه اوقدر علی دئدی، دئدی، آخیردا حاجی علی قبول ائیله دی ،فیروزا دئیلسین فیروز قبول ائیله سه ،گورسونلر نئیله مه لیدیلر .

بویون ناهاردان قاباق حاجی علی له -فیروز علی نی گوزه تله یردیلر. علی گلیب چاتاندا فیروز اونا اوز دونده ریب ،اوجا سسله ناراحات حالتده ،دئدی: من سنین تک بئکار دئییلم. مچیدی نامازا گره ک آچام .اوردان اوقافا ،حوسینییه نین ایشیندن اوتروگئده جه یم. بیرده مچیدین خیمه سین -علملرین محررملیقا تعمیره وئره جه یم .تئز اول سوزون دئینه،ایشیم وار.

 علی آچدی ماجارانی دئدی، آخیردادا حاجی علی، دئدی: ائله بیل سنه وئردیقیم یئر، ایکی باتمان چوخدی. فیروز بیر بوزاردی –قیزاردی، بیردن نه آلدی -نه ساتدی ،دئدی :سیز وئردیغیز - ساتدیغیز یئرین اولچوسو دوزدو ، او ایضافه نی  یئره من یولدان قاتمیشام  سیزه اصلا ربطی یوخدی!!

 

گرگرلی آراز


ائله بیل قایناتادا کوره کنه تایدی!

یازار : گرگرلی آراز

+0 به یه ن

ائله بیل قایناتادا کوره کنه تایدی!

 

سلیمان گوزلجه تویو باشا چاتمیشدی، هامی بو تویدان دانیشیردی .اوغلان –قیز طرفی دانیشاندا ،اوز راضیلیقین بیلدیریردیلر.

 بئله بیر عادت وار تویون اوچو گونو، اوغلان قیزی گوتوروب، قیزگیله گئدیللر، آیاق آشمالارین آلسینلار. سلیماندا اؤز نیشانلیسن اوچو گونو گوتورموشدی ،شاما قایناتاسی  گلیلده قوناقیدیلار.

 خیلاصه شامدان سونرا چای ایچدیلر ،یئر-یئمیش یئییلیب قورتولاندان سونرا قایناتاسی اوز دوندردی سلیمانا ،دئدی : سلیمان ایه ر راضی سیز تویله ده او قره دانانی آیاق آشماقا گوتورون آپارین .یوخ ایه ر ایسته میرسیز بش ده نه قویون قوزولاری یانیندا ،سورودن اؤزن آییر.

نه سلیماندان سس چیخدی نه ده قیزدان ،چوخ دییه ندن سونرا سلیمان دیله گلدی :من نه قره دانانی ایستیرم نه ده بش ده نه قویون قوزولاری یانیدا ،من او تزه گتیره ن آلا ایتی ایستیرم !بیردن سس اوتاقدا کسیلدی، هئچ کسدن بیر سس چیخمادی .قایناتا  بیردن اؤز دوندریب آروادینا، یاواش دئدی :مصمه  ائله بیل کوره کنده اودوزموشوق !اوزون دونردی سلیمانا ،دئدی: سلیمان ده ده مالین بوتووون منه وئره سن او ایتی سنه وئرمه رم !!

 

گرگرلی آراز


مدیرلرین مئتیرلری نئجه ایشله نیر؟!

یازار : گرگرلی آراز

+0 به یه ن

مدیرلرین مئتیرلری نئجه ایشله نیر؟!

دوکتور جئری آپارتمانی دوزه لدیب قورتاراندان سونرا ،پیمانکار موهندیس ائلچی بئی ایله ایش باشینا گلیب ،ائشیکده داشلار کی قالمیشدی ،ایسته دیلر مئتیرله یب حئساب گئتسینلر.
ائلچی بئی ماشیندان اولچو اوچون مئتری گتیردی .باش اوجون دوکتور اله آلیب آپارتمانین بیر طرفینه گئددی .بو باشدان ائلچی بئی سوروشدو ،دوکتور جئری نئچه مئتیر اولدو ؟دوکتور بیر الینن عینکین توتوب بیر آز ایلیب، دئدی: یوز یئتمیش مئتیر .
ائلچی بئی اعتیراض ائیله دی ،دئدی :یوخ چوخ اولار بیر -ایکی دفعه اولچندن سونرا گوردولر اولمادی ،ائلچی بئی دئدی :دوکتور جئری سیز منیم یئریمه گلین ،من سیزین یئریزه گئچیم.
 .یئرلرین بیر بیریله عوض ائله یندن سونرادا یئنه اولچو  دوز اوخونمادی ائلچی بئی ده ایضافه گتیردی.
یولدان سهلانلی قدرت گئچیردی، اوندان کومک آلدیلار. او آپارتیمانین اولچوسون ایکی یوز اون مئتیر گتیردی .هم دوکتور جئری همده ائلچی بئی دینمه دن راضی قالدیلار .
اوندا ایکی سیده اوز توتوب سهلانلی قدرته ، دئدیلر : بیزده بس نییه مئتیر دوز چیخمیردی ؟قدرت دئدی: او زامانا کیمین کی ائلچی بئی اووجوندا ییغدیغین مئتیری اوتورمه یه ،بیرده کی دوکتور جئری اوتوردوقلارین مئتیردن ییغمایا  بو ایش جور گلمییه جک!!


گرگرلی آراز

  • [ 1 ][ .. ][ 3 ][ 4 ][ 5 ][ 6 ][ 7 ]