عومرومون باغیندان

یازار : گرگرلی آراز

+0 به یه ن

بیر-ایکی گون قاباق ائلچی بئی جنابلارین حالین سوردوم گوردوم ،چوخ حالی پریشان -یورغون گورسه نیر .بیر آز دانیشاندان سونرا بو شعری منه گوندردی ایسته یرم ائلچی بئی جنابلاری نین حال - احوالیندا اولان آنلاری،اوزومله برابر  سیز گوزل اوخوجولاریدا شریک ائدم.


عومرومون باغیندان

  

سوروشما حالیمی پوزقونام *آراز
خیالیم دالینجا یول گئدیر ایندی

عومور بویی زحمتینی چکدیگیم
گوزومون اونونن بیل گئدیر ایندی

بالا قایقی کشی آتایام منده
آرزیلاریم ایاق سالدی دوننده
یاراقلانیبب ائودن یولا دوشنده

دئدیم یورت یئریندن ائل گئدیر ایندی

بیر سفیل بوتایام داغدا بیتمیشم
دالینجا آغلاییب حالدان گئتمیشم
یئدی یول آراسی بئله ایتمیشم

عومرومون کاروانی ول گئدیر ایندی

زحمت چکدیم باغ بئجردیم بئش گوله
اءییلمه دیم باش وئرنده موشگوله
نه بیلییدیم گلجکدیر ایش بئله

باشیمی چولقاییب یئل گئدیر ایندی

دئیللر کی گئدن کسی ساخلاما
*یولچو-لارین دالیسیجان آغلاما
آی (ائلچی بئ) سنده منی دانلاما

باشیما چکیلن ال گئدیر ایندیر
عومرومون باغیندان گول گئدیر ایندی

ائلچی بئی

*اورتانجیل اوغلوم مرادین آوروپا سفرینه چیخماق موناسبیتنه یازدیم
*آراز بئی--حورمتلی قلمداشیم گرگرلی آراز جانابلارینا اوز توتاراق یازدیم
*یولچو--تورکودیلینده سفربر اولان کیمسه یه دئییلن سوزدور

  • [ ]