قیل کؤرپوسو
یازار : گرگرلی آراز
+0 به یه ن
قیل کؤرپوسو
صفدر معللیم، بیر گون ساهاتی یوخولو اوخوموشدو؛ اونا گؤره او چؤره ک خانایا بیر ساهات تئز گلمیشدی. خمیر ائله ییب؛ تندیری سوپورندن سونرا، اوتوروب، بیر چایلاشدیق. سؤز اویان- بویانا گئدیب، صفدر معللیمین کوردوستاندا سیپاهی دانیش اولدوغو گؤنلره چاتدی. او بئله سؤیله ییردی:
بیر گون کتده ایدیک، دئدیلر کاک عبدالله دونیادان گئتدی، ائو ییه سی منه دئدی: صفدر معللیم سنینده گئتمه یین یاخشی دوشر؛ بیرلیکده گئدک.
او زامان یئتیشدیق کی، قبیر قازیلیب، اؤلونون یویولماسیدا قوتاریردی. بیر آز دایاندیق. اوچ- دؤرت نفر اونا خلعت بیچیب، و کفن ائله ییردیلر؛ بیردن بیزیم یانیمیزدا دورانلاردان بیری ائوه ساری قاچدی. او بیر آز سونرا اَلینده بیر اوچ اولدوز صابین ایله قاییدیب؛ اونو کفه نی باغلایانا وئردی؛ اودا صابینی آلیب، قویدو اولونون آیاقلارینین آلتینا، و سونرادا کفه نین اوجلارینی باغلادی.
اؤلو نامازی قیلیندی؛ اؤلو قبیره تاپشیریلدی؛ و بیر فاتیحه دن سونرا بیزده ائوه ساری قاییتدیق.
یولدا حاجی عوثماندان خبر آلدیم؛ حاجی عوثمان! من بو ایشلرین هامیسینی باشا دوشدوم؛ چوخو ائله بیزیم دبلریمیزه تایدی؛ آما بو، اؤلونون آیاغینین آلتینا صابین قویماغی باشا دوشمه دیم؛ او نه اوچوندور؟!
دئدی: بو صابین قویماق چوخ گرکلی بیر ایشدیر. قیل کؤرپوسون ائشیتمیسن؟ دئدیم: ائشیتمیشم، آما یانی نه اولسون کی؟
:صابین اوندان اؤترودور کی، اؤلو قیل کورپوسونون یانینا یئتیشنده، تئزجه نه زوووب، اورادان کئچسین.
او زامان حاجی عوثمانین بو سؤزوندن بیر زادلار باش چیاخارا بیلمه دیم. آما تازالیقدا بو ایشین سیررینا ال تاپمیشام.
و ایندی اینانیرام کی صابین اؤلونون یانیندا، اونا غوسلداندا واجیب اولور کی هئچ؛ بلکه اوندان قاباغادا دوشه بیلر. چونکو ایشین لاپ چتین یئری قیل کؤرپوسوندن کئچمکدیر، و غوسل، ناماز، ،کفن، فاتیحه... هئچ بیری بورادا اؤلونون دردینه ده یمیر. قیل کؤرپوسونده، اوچ اولدوز صابینین یئرین هئچ زاد وئرمه ییر. آمان بو قیل کؤرپوسوندن!
آلتی آی بوندان قاباق قیچیمین آغریسینا کؤره خسته خانادا جرراحلیق اولوندوم. ایکی- اوچ ساهات جرراحلیقدان سونرا، هوشه گلدیم. چوخ آداملار گلمیشدی. هم کاغیذ قوحوملاری؛ همده قان قوحوملاری.
دوستلاریمداندا بیر نئچه سی گلمیشدی؛ «رشید» ده گلمیشدی؛ اورادا نوخوش منیدیم؛ آما هامی بیرینجی « رشید» ه باخیب، اونا سالام وئریردیلر؛ سونرا منیم کئفیمی سوروشوردولار. دوزو منیم اؤزومونده دردیم یادیمدان چیخمیشدی. چونکو منیم گؤرمه ییمه « رشید» گلمیشدی. اونون گلدییینه گؤره من هامییا پوز وئریردیم. آخی او بؤیوک مقاملی، و روتبه سی اوجا بیر آدامیدی.
«رشید» ین گلمه سینی اورانین پرستارلاری ائشیدیب، خسته خانانین باشکانینا ودوختورومادا خبر وئردیلر. اون دقیقه دن سونرا رئییس،دوختور و پرستارلار بیرگه منیم یانیما یئتیردیلر.آدی مینم کئفیمی سوروشوب، اؤزلرین «رشید» ین گؤزونه سوخوردولار. «رشید» بیر بونو سوروشدو: بیزیم بو خسته نین دورومو نئجه دیر؟ و اونو خسته خانادان هاچان بوراخاجاقسینیز؟
دوختور منه گؤره بیر نئچه سؤزلر دانیشیب، سونرادا بیر نوسخه یازدی. رئییس تئزجه نوسخه نی آلیب وئردی پرستارا، دئدی: فیکرینده اول!
پرستار تئز قاچدی، داوالاری گتیرسین.
رئییس آخیر سؤزه گلدی: آغا« رشید» سیز بونا گؤره فیکیر ائتمه یین. سیزین خسته نیزین حئسابی وئریلب. ساباح ائله یه بیلر ائولرینه گئتسین.
نه جرراحلیق پولو، نه خسته خانا پولو، نه تخت پولو، نه درمان پولو، هئچ بیرین بیزدن آلمادیلار!
چونکو بیزیم ده اؤلوموزون آیاقلارینین آلتیندا بیر اوچ اولدوز صابین واریدی؛
قیل کؤرپوسونه یئتیشنده، اورانی زوووب گئچدی.
گرگرلی آراز