قورو-قوروسونا نه محببت!
یازار : گرگرلی آراز
+0 به یه ن
قورو-قوروسونا نه محببت!
محممد دئیردی :او ایل باجیم کی قونشو کنده ار ائوینه گئتمیشدی. بیزبوتون عائله یله اونلارا قوناق گئدنده، باجیمین قاینی، منیم بو بیرسی باجیمی گورنده ،گولومسوله نیب ،گوز آلتی باخاندا، بیر بهانه یله قاباغا گلیب، منی دیندیریب ، آتامدان ایزن ایسته دی : منی دولاندیرماغا آپارسین. آتام ایجازه وئرندن سونرا، او گون باجیمین قای نیله هر یئره گئدیب، باغچا- باغا باش ووروب، حتتا محلله توکانیندا نقدر یئر- یئمیش، کیشمیش- نخود واریدی، منه یئدیددی، یادا جیب لریمه دولدوردو.خیلاصه هر شئی یی مندن خبر آلیب، منه محببت ائیله دی. بونون اوستوندن بیر آلتای کئچمه میشدی، بو بیرسی باجیمین ائلچی لرینه، آتام راضیلیق وئردی. بو بیرسی خیردا باجیمدا ار ائوینه کوچدو. دونه سی ایل بویوک باجیم گیله قوناق گئتمیشدیم ،گوردوم باجیمین قاینی همان آدام دئییل. داها منی دولاندیرماقا، یاخوت بیر شئی آلیب یئمکه، بیر یئره آپارمیر هئچ،هردن دوداق آلتی دا بیر-ایکی یامان یوووزمنه آتیر. باجیمدان خبر آلدیم: نه خبر اولوب؟ دئدی: محممد، باجیمیز اره گئدندن سونرا، سن سهلی سن ،منی ده داها دانیشدیرمیر !
قدیم ایللرده اوروجلوق گلنده، دوولت بش آلتی گون اوروجلوقا قالان دوگو –یاغ- قند –آیری لوازیمات موفته سینه،یاخوت اوجوز قیمته وئریب، او بیرسی جینسیلرینده قیمتین ثابیت ساخلاماق اوچون بیر فیکیر چکردی. آمما بولنمیرم نه اولوب بونلاری کی هله داها وئرمیر، هئچ ، رایانه میزیده بو سفر بواختا ساخلانیب. بلکه محممد باجیسین ار ائوینه گونده ریب!!
گرگرلی آراز
یولداش چیلیق
یازار : گرگرلی آراز
+0 به یه ن
یولداش چیلیق
چایخانادا سیفی الین موحکم میزین اوستونه چالیب، دئدی :یعنی منیم، سنین یانیندا، ییرمی شیشک جاندا اعتیباریم یوخدو؟ گلن هفته بویونکو گون گلیب، بوردا چایخانادا مندن پوللارین آلارسان، قالدی قویونلار، آلتای چکه وئریرسن؟ اودور رحمت ایسته یر، ایسته یرسن چاغیریم گلسین .
حوسین بیر یئرینده قیوریشدی، سونرا باخیب سیفی نین اوزونه، دئدی :کوپک اوغلو سنین سوزلره ن اعتیبار یوخدو. دئیرسن گلن هفته، من راضییام سن بو شیشکلرین پولون ایکی آیدان سونرا وئرگیلن! اونودا وئرمیسن آخی .
سیفی بیر ناراحات اولدو، دئدی :من سنین بورجون گلن هفته وئرمه سم؟ گل بو جاماعاتین یانیندا، منیم اوزومه توپور!حوسین گوله –گوله، دئدی :هئچ سنی تاپا بیله جه یم کی اوزه ن توپورم. سیفی دالیسین توتوب ،گولومسوله نیب یانیندا فتع اللاه اوتورموشدو، اوز دونده ریب اونا ، دئدی :حوسین منی ده تاپا بیلمه سن بو فتع اللاهین اوزونه توپور رسن! هامی گولنده، فتع اللاه ناراحات اولوب، دئدی: سیفی منیم اوزومه نییه توپورسون؟ سیفی باشی آشاغا گوله – گوله، دئدی: فتع اللاه یولداش چیلیق بس نه یه دئیبلر؟!سنیله یولداشیق دا بس!!
گرگرلی آراز
ائششکی آتینان تانییاللار
یازار : گرگرلی آراز
+0 به یه ن
اوشاق ادبییاتی......اوشاق صحفه لره بیر باخیش....نئچه حیوانلار اوچون آتا-بابالار سوزلری شعریله
.......................ائششکی آتینان تانییاللار.................................................................
ائششک گیردی تؤیله یه
باخدی او یولداشلارا
باشلادی تانیشلیقی
سوزو وار قارداشلارا
چوخ دئدی هئچ کس اونو
تانیمادی بیر حیوان
هئچ کس اونو گورمه یب
توتولدو اونا دیوان
قاپی آچیلیب آندا
دالیجان گلدی چیخدی
ائششکی بیر بوجاقدا
تورا سالیب برک سیخدی
تؤیله ده بیر طرفده
اوکوز باخیب سسله دی
آت قارداش خوش گلیب سیز
بویوک توتوب بسله دی
ائششک ائششکلیقیندا
دوردو بیر سوز دئمه دی
چکدی میشقوتلاری او
آرپا- یونجا یئمه دی
آتا بویور دئدیلر
یونجا- آرپا بوشقابدا
توفنگیله عکسیلر
قابا سالیب ایشقابدا
آچیلسینلار خیصلت لر
بولوندو دال بادالدان
آت- ائششکلر تانینسا
قورتولاق قالماقالدان
آت کی تانیندی اوردا
او بیر سی اولدو ائششک
ائششکی تانیدیلار
ائششکه اولمادی شک !
گرگرلی آراز
سوت گونون یئمه گی موفته دی!
یازار : گرگرلی آراز
+0 به یه ن
سوت گونون یئمه گی موفته دی!
قولو موعللیم دئیردی : جولفادا موعللیم عنوانیندا ، دبیریستاندا درس دئیره م.تعریف ائیله ین گونو اوچ نفر هم یئرلی احمد موعللیم- حق وئردی موعللیم- بیرده من درسیمیز قوتاراندان سونرا ،گلیب دمیر یولونون یئمکخاناسیندا ناهار یئمکه وارید اولدوق. حق وئردینین یئمکخانایا گلمه سی ایلک دفعه سیدی. مندن خبر آلدی: بورانین آیاق یولوسو هاردادی؟ منده نیشان وئردیم. او هی نیده احمد موعللیم دوردو، اوچ ناهارین ژئتونون اورانین مسئولوندان، صمد آغادان کی اوز هم یئرلیمیزیدی، آلدی. حق وئردی گلن آن ، ناهاریدا گتیردیلر. یئیب- ایچیب قورتاراندان سونرا دوروب گئدنده، حقوئردی قاچدی حسابلاسین، احمد موعللیم دئدی: نه قایریسان؟ بویون سوت گونودو پول آلمازلار!
ائشیکه چیخاندا، حقوئردی سوروشدو، دوغوردان گوزلدی من هر سوت گونو بورا گله جه یم!
بوردان سونرا بیزه صمد آغا تعریف له یر. او دئیردی: سیزین بو یولداشیز حقوئردی موعللیم، سوت گونو گلدی، ادب ارکانیله ناهارین یئیب قورتاراندان سونرا، پول وئرمه میش دوروب گئدنده ،من دئدیم :حق وئردی موعللیم بی زحمت یئمه ییزین پولو قالدی! او بیر اوجا سسله دئدی: مه یر بویون سوت گونو دئییل؟ دئدیم: دوز دئیرسیز بویون سوت گونودو .حقوئردی موعللیم اللرین آچدی، دئدی: اوندا بس نه پولو؟ مه یر سیز سوت گونو یئمه یی موفته وئرمیرسیز؟ !!
گرگرلی آراز
گوره سن کیم حسابلادی !
یازار : گرگرلی آراز
+0 به یه ن
گوره سن کیم حسابلادی !
اینقیلابیمیزین ایلک دووره لرینده، هامی سئچیم دوورونده، شورا مجلیسیمیزه کاندید اولوردولار.من دییه ن دووور موهندیس صراف جنابلاریدا کاندید اولموشدو. قولو موعللیم دئیردی: مهدینین چایخاناسیندا اوتورموشدوق، صرراف جنابلاری چایخانایا وارید اولدو. چایخانا انگینه جان دولویدو. هامیله بیر- بیر گوروشوب، دئیردی: من موهندیس صرراف! من صررافام! من صرراف بو دووره ده کاندید اولموشام. هامینان گوروشوب قورتاراندان سونرا ،گئچیب آشاقا باشدا باشماقلارین چیخاردیب، چونبه لن اوتوروب، دئدی :مهدی بئی چایخاناداکیلارین هامیسینا چای وئر! بوتون اوردا اوتورانلار چای ایچیب،ایچه -ایچه هره اؤز سوال –جوابلارین ائیله یردیلر. دوروب گئدنده، دئدی: هامیزدان چوخ تشکور ائیله یرم. اینشااللاه کی بو دووره منه رای سالاجاقسیز. بیرده بی زحمت منیم ده بو ایکی چاییمی بیریز حسابلایارسیز!!
گرگرلی آراز